Kva skjer, og når skjer det?

Kommunestyret vedtok Kommuneplanen sin samfunnsdel (KPS) for Bjørnafjorden kommune 2023–2035 med ambisiøse mål og strategiar. 

Kommuneplanen skal ha ein samfunnsdel og ein arealdel. Vår KPS omfattar det meste kommunen skal prioritere å jobbe med i heile perioden. 

KPS har mange arealmål og strategiar som må konkretiserast og komplimenterast i arealdelen til kommuneplanen (KPA). 

Kommunestyret vedtok Kommunal planstrategi 2024–2028, som slår fast at samfunnsdelen til kommuneplanen (KPS) blir vidareført, og at kommunen skal utarbeide ein ny og samla arealdel til kommuneplanen i planstrategiperioden. 

Formannskapet gav administrasjonen fullmakt til å utarbeide eit strategisk planprogram i sak som skal konkretisere og komplimentere arealmål og strategiar i KPS. Eit arbeidsdokument er utarbeida og lagt fram for formannskapet i sak 45/2025

 

3. juni var arbeidsdokumentet for planprogrammet oppe i regionalt planforum. 
Her kan du lese meir om regionalt planforum, møteplan og kven som deltar. 

12. juni hadde kommunestyret og plan-, bygg- og miljøutvalet (PBM) ein politisk verkstad for å jobbe med strategisk planprogram. 

Her kan du sjå innspela frå verkstaden.  (XLSX, 30 kB)

• Formannskapet skal behandle forslag til planprogram i september. 
• Planprogrammet skal sendast på høyring i 6 veker. 
• Kommunen opnar for arealinnspel. Dette vil bli annonsert samtidig med at planprogrammet blir lagt på høyring. 
• Det blir invitert til folkemøte og bransjetreff ut over hausten. 
   

Har du meiningar om korleis bestemte område i kommunen vår best kan brukast i framtida? For eksempel kvar det bør opnast for å bygge bustader eller næringsbygg, areal som bør tilbakeførast til landbruk, område som er eigna - eller ikkje eigna - for havbruk, areal som bør setjast av for friluftsliv eller anna?

Frå september 2025 til februar 2026 kan du sende innspel til framtidig arealbruk i eit eige digitalt skjema. Før du kan sende inn skjemaet, må du legge ved kart der du har merka av kva område du sender innspel om. Vi har laga ei oppskrift på korleis du markerer i kartet. Skulle du stå heilt fast, er det berre ta kontakt med planavdelinga. 

Dersom du har meiningar om ulik arealbruk i same område, for eksempel at det bør opnast for å legge ut flytebrygger, men ikkje bli lagt til rette for fiskeoppdrett, så må du sende to separate skjema. Dette er for at vi skal vere sikre på at alle innspela som kjem inn blir registrert på rette måten.     

• Kommunestyret skal vedta planprogram i desember. 
• Medverknadsfase for arealinnspel held fram til 15. februar. 
• Det vil bli invitert til folkemøte, dialogmøte og administrasjonen vil ta aktivt kontakt med grunneigarar, forslagsstillarar og andre interessentar for å få gode arealinnspel. 

No startar behandling av arealinnspel. Innspel som inneber utbygging må sannsynlegvis ha konsekvensutgreiing (KU) for verknadar for miljø og samfunn. Våren vil gå med til kunnskapsgrunnlag og utarbeiding av planforslag. 
Planforslag for enkelte område kan bli ferdig tidlegare enn andre. Formannskapet kan få utkast til behandling og kommunen kan legge det fram for regionalt planforum til diskusjon. 
 

Planforslag må ferdigstillast og kvalitetssikrast og skal sendast på høyring i november.  

No startar merknadsbehandlingar og tilarbeidingsfasen. Kommunen tar sikte på at det ikkje skal vere behov for større endringar. Formannskapet må tidleg be om meklingsmøte dersom det er kome motsegn til planforslaget. Eventuell mekling kan forseinke planen med nokre månadar, men tilarbeidingsfasen og førebuing for mekling kan skje parallelt i løpet av våren

No skal KPA leggast fram for kommunestyret for endeleg godkjenning. Det skal vere mogeleg å få dette til i juni dersom det ikkje er behov for mekling.