Skulereglar

Skulereglane skal bidra til å fremje helse, trivsel og læring for elevane. Dei skal leggje grunnlag for at elevar viser respekt og tek medansvar for eit trygt og godt læringsmiljø. Skulen skal samarbeide med elevar og føresette i arbeidet for å nå måla. Skulereglane skal ivareta den einskilde elev sine rettar og plikter i tillegg til det som er fastsett i lov eller på anna måte.

Skulereglane gjeld for alle grunnskulane i Bjørnafjorden kommune og kan ikkje fråvikast. Skulereglane gjeld i skuletida, og omfattar skuletimar, friminutt, SFO, skuleskyss og aktivitetar organisert av skulen. Skulereglane kan også få verknad i situasjonar nært tilknytt skulen og der åtferda kan ha direkte verknad på skulesituasjonen for elevane. Det kan vere hendingar på skulevegen og krenkingar som skjer utanfor skuletida som er påverka av opplevingar på skulen eller set preg på den. Skulereglane gjeld også for den digitale åtferda. Det betyr at det som skjer via skulen sitt internett, digitale verktøy og sosiale medium vil kunne omfattast av skulereglane. Det er forventa at alle følgjer generelle reglar for god åtferd. Dette er viktig for å skape eit godt læringsmiljø der alle har det trygt og godt. Skulereglane sitt innhald skal vere gjenstand for samtale gjennom heile skuleåret, noko som vil skape ei god ramme og verke dannande for eit samla skulemiljø. Skulen pliktar å gjere tilsette, elevar og føresette kjend med innhaldet i reglementet. Skulereglane skal gjennomgåast ved skulestart kvart år og rektor er ansvarleg for at dette blir gjort. Ved eventuell motstrid er forskrift om skulereglar overordna den enkelte skule sine lokale reglar. Rektor fastset lokale reglar etter medverknad frå elevar og føresette.

Elevane og føresette skal få vera med på å planleggje, gjennomføre og vurdere verksemda til skulen, blant anna arbeidet med skulemiljø, kvalitetsutvikling i opplæringa og fastsetjing av skulereglar jf. opplæringslova § 10-4. Det er naturleg at dette skjer via elevråd og FAU. 

Elevråd 
Kvar skule skal ha eit elevråd som er valt av elevane på skulen. Elevane kan velje å organisere seg på ein annan måte (opplæringslova § 10-5). 

Foreldra sitt arbeidsutval (FAU) 
Kvar skule skal ha eit arbeidsutval som er valt av føresette på skulen. Føresette kan velje å organisere seg på ein annan måte (opplæringslova § 10-5). 

Skulemiljøutval (SMU) 
Kvar grunnskule skal ha eit skulemiljøutval (SMU). Utvalet vil vere rådgjevande og det vil vere eit fleirtal av elevar og føresette. Utvalet skal prioritere arbeidet med å skape eit trygt og godt skulemiljø. Kommunen skal ha eigne rutinar for skulemiljøutval. Skulemiljøutvalet skal ha 3-4 faste møte pr. skuleår, og medlemar i nytt skulemiljøutval er sett saman av: 

•  2 elevar 
•  2 representantar frå FAU 
•  2 tilsette 
•  1 representant vald av kommunestyret 
•  1 rektor (sekretær)

Barnekonvensjonen art. 3 og art. 12, Grunnlova § 104 og forvaltningslova § 17 gir alle barn ein rett til å bli høyrd i saker som omhandlar dei og at barnet sitt beste skal vera eit grunnleggande omsyn. 

Omsynet til barnet sitt beste er ein rettigheit, eit grunnleggande omsyn og ein saksbehandlingsregel. Det betyr at omsynet til barnet sitt beste alltid skal vurderast, og det vil vere ein saksbehandlingsfeil dersom ei slik vurdering ikkje er gjort. Omsynet til barnet sitt beste er ikkje den einaste faktoren, men ein svært viktig faktor. I vurderinga av kva som er eleven sitt beste, vil eleven si oppfatning vere sentral. Det er likevel ikkje alltid at eleven eller føresette si mening er til det beste for eleven. 

Alle barn har rett til å bli høyrt i saker som vedkjem dei. Dette gjeld uavhengig av alder eller føresetnadar. Det må alltid vurderast om eleven er høyrd godt nok i saka eller om ein må høyre eleven sjølv. Utgangspunktet er at barnet skal høyrast direkte, men barnet kan også høyrast gjennom objektive personar, føresette, gjennom brev m.m. Det kan også tenkast at barnet si stemme kjem tydeleg nok fram i annan dokumentasjon. Barnet har ikkje ei plikt til å uttale seg.

a) ha eit trygt og godt læringsmiljø 
b) bli behandla med respekt og omtanke 
c) sleppe å bli utsett for fysiske, psykiske, digitale og verbale krenkingar 
d) ha sine eigendelar i fred 
e) bli kjent med skulereglane og kva for nokre konsekvensar som kan bli innført ved brot 
f) ta opp aktuelle saker gjennom klasseråd og elevråd 
g) bli tatt med på råd ved endringar i skulereglane

a) følge allmenne aksepterte normer for åtferd 
b) bidra til at skulen har eit trygt og godt læringsmiljø 
c) vise respekt og omtanke for alle i skulemiljøet 
d) følgje skulereglane i sin heilskap

a) møte presis til opplæring og avtalar 
b) ha med læremiddel og nødvendig utstyr til læringsarbeidet 
c) gjere god innsats i skulearbeidet og halde fastsette fristar 
d) ta vare på skulemateriell, utstyr og inventar 
e) hjelpe til å halde orden på skulen, både ute og inne 

a) vise omsyn og respekt for medelevar og tilsette 
b) bidra til eit godt læringsmiljø 
c) delta i opplæringa og opphalde seg innanfor skulen sitt område 
d) behandle undervisningsmateriell forsvarleg og vise respekt for skulen og andre sine eigendelar 
e) praktisere godt nettvett og bruke digitale einingar som ein kan kommunisere med, som t.d. mobil, smartklokke, nettbrett, etter gjeldande ikt-reglement eller etter avtale med lærar. Skulane i Bjørnafjorden kommune skal vere mobilfrie. Kvar skule skal utarbeide lokale reglar for oppbevaring av mobiltelefonar i skuletida. Smartklokker skal likestillast med mobiltelefonar.

a) språkbruk eller handlingar som krenker andre: t.d. mobbing, diskriminering, rasisme, utestenging, vald eller trugslar om vald 
b) ha med seg eller bruke rusmiddel som t.d. alkohol, tobakk, snus 
c) ha med seg eller bruke farlege gjenstandar som kan skade personar, bygningar eller inventar 
d) bruke plagg som heilt eller delvis dekker ansiktet, jf. opplæringslova § 27-2

Om eleven bryt skulereglane skal eitt eller fleire av følgjande tiltak setjast i verk: 

a) påminningar om regelverket 
b) samtale med lærer og dialog med heimen 
c) møte mellom kontaktlærar, elev og føresette 
d) oppfølging av leiinga ved skulen 
e) inndraging av gjenstand, gjeld også mellombels inndraging av mobil 
f) bortvising etter § 13-1 i opplæringslova 
g) heimsending ved alvorlege brot på reglement på leirskule/skuletur 
h) nedsett karakter i orden og åtferd 
i) pålegg om å rette opp ev. skadane som er utført 

• krav om økonomisk erstatning, jf. lova om skade-erstatning 

j) Ved alvorlege mobbesaker kan mobbaren verta flytta til annan skule 

Ved alvorlege eller gjentekne regelbrot, jf. § 9 og 10, der det er aktuelt med sanksjonar som nemnd i § 10 skal det fattast vedtak etter forvaltningslova § 2. Eleven har rett til å bli høyrd, føresette skal kontaktast og har rett til å uttale seg før vedtak fattast. 

Straffbare forhold blir som hovudregel meldt til politiet, i tillegg til skulen sine eigne sanksjonar for forholdet.

Eleven si stemme og eleven sitt beste er grunnleggande omsyn som skal vere tatt med i all saksbehandling i skulen. Sanksjonar skal stå i forhold til brota på skulereglane. Eleven sin alder og føresetnadar for å forstå eigne handlingar skal takast i betraktning når ein vurderer sanksjonar. Eleven skal alltid ha rett til å forklare seg. Dette betyr at før det blir tatt ei avgjersle om kva konsekvensar handlinga medfører, skal skulen legge til rette for at eleven blir høyrd. Skulen skal alltid informere føresette om både hendinga og reaksjonen skulen set i verk. Oppfølging av eleven skal skje i dialog mellom skulen, eleven og føresette. Ved svært alvorlege hendingar kan skulebytte vurderast, jf. opplæringslova § 13-2.

Den kommunale forskrifta om skulereglar for grunnskulane i Bjørnafjorden kommune gjeld frå 01.01.25. Skulereglane har vore på høyring i organisasjonane og skuleleiinga, til politisk høyring i ungdomsrådet, formannskapet og til godkjenning i kommunestyret. Reglementet gjeld frå 01.01.25 med heimel i lov 9. juni 2023 nr. 30 om grunnskulen og den vidaregåande opplæring §10-7 skulereglar, § 13-1 Bortvising §13-2, og § 12-2 Retten til eit trygt og godt skulemiljø. Handsaming av brot på ordensreglementet følgjer reglane i opplæringslova, forvaltningslova og dei alminnelege retningslinjer for god forvaltningsskikk. Dette vil også omfatte reglane om samarbeid med heimen i forskrift til opplæringslova. Føresette har klagerett i dei høver sanksjonar fører til enkeltvedtak.