Innspel til trafikksikringstiltak

Kommunen sitt innspelskjema gjeld berre kommunale vegar. For å unngå å få skjemaet i retur, må du først undersøke kven som eig vegen der du meiner det trengst trafikksikringstiltak. 

På Bjørnafjordenkart kan du sjå kven som eig vegen. 

• Blått viser offentleg kommunal veg.
• Raudt viser fylkes-, riks- og europaveg. Innspel om fylkesveg sender du til Vestland fylkeskommune. Innspel om riks- og europaveg sender du via Statens vegvesen.
• Gult viser privat veg. 

For å få fram farge på vegane, må du velje kartlag samferdsle, og deretter zoome inn i kartet. 

Slik gjer du det: 

1. Gå til Bjørnafjordenkart 
2. Klikk på Kartlag oppe til venstre (ved kommunevåpenet)
3. Hak av i boksen ved Samferdsle (oppe til høgre)
4. Zoom inn i kartet - då får du fram fargar på vegane. Er den aktuelle vegen blå, kan du bruke dette skjemaet til å melde.

Eksempel på fartshump. Åslaug Bergsvåg

Dersom minst 15 prosent av trafikken på ei strekning overskrid fartsgrensa med minst fem kilometer i timen, kan det vere aktuelt med fartshumpar. Det må alltid ligge vegfaglege vurderingar til grunn. Vi tar m.a. omsyn til brøyting, flaumfare og tungtrafikk.

For å vurdere om det er aktuelt med fartshumpar, må vi gjennomføre fartsmålingar på staden. Når vi får inn nye forslag via skjema (sjå lenke under), legg vi det til på prioriteringslista.

Meiner du at farten er for høg i forhold til fartsgrensa? Vil du foreslå fartshumpar som fartsdempande tiltak? Fyll ut skjema for melding om veg, trafikk og trafikkforhold.

Før du melder, hugs å sjekke om det er ein kommunal veg (sjå første punkt “Kven eig vegen?”).

Åslaug Bergsvåg

For å vurdere kvar det er behov for gangfelt på vegane våre, må kommunen gjennomføre trafikktellingar. Teljinga viser kor mange som kryssar vegen på dei travlaste tidspunkta på dagen. Om det er aktuelt med eit nytt gangfelt, kjem m.a. an på kor mange fotgjengarar som kryssar vegen, sikta på staden og om det er ei rett strekning eller ein kurve. 

Gangfelt i seg sjølv er ikkje eit trafikksikringstiltak, men eit tiltak for å gjere det meir framkommeleg for mjuke trafikantar. I Noreg kan du i utgangspunktet krysse vegen kvar som helst. Undersøkingar viser at mjuke trafikantar som kryssar vegen utanfor gangfelt har et meir bevisst forhold til eigen sikkerheit, og dei ser seg betre om før dei kryssar vegen. Derfor er ikkje alltid gangfelt det tryggaste alternativet. 

Ønsker du å søke om gangfelt ein stad der mange kryssar vegen? Fyll ut skjema for meldingar om veg, trafikk og trafikkforhold.

Før du melder, hugs å sjekke om det er kommunal veg (sjå første punkt “Kven eig vegen?”).

Åslaug Bergsvåg

Fartsgrensa blir bestemt på grunnlag av ei fagleg vurdering av vegen sin funksjon og området vegen ligg i (for eksempel om det er nær ein skule eller barnehage). 

30 km/t er lågaste mogelege fartsgrense på offentleg veg i Noreg. Det er altså ikkje lov å sette fartsgrensa lågare enn 30 km/t.

Meiner du at vi bør endre fartsgrensa på ei bestemt strekning? Fyll ut skjema for meldingar om veg, trafikk og trafikkforhold.

Før du melder, hugs å sjekke om det er kommunal veg (sjå første punkt “Kven eig vegen?”).

Åslaug Bergsvåg

Parkerte bilar kan hindre sikt og framkomme.  Å innføre parkeringsforbod er likevel strengt regulert i Statens vegvesen sine handbøker, også kalla skiltnormalen.

I Bjørnafjorden har vi mange smale vegar. Parkering som medfører at møtande trafikk må vente, er ikkje aleine god nok grunn til å innføre parkeringsforbod. Der det er nødvendig for at større køyretøy, for eksempel utrykningskøyretøy, skal komme fram, kan det vere aktuelt å forby parkering. 

Ser du behov for parkeringsregulering for å betre sikt og/eller framkomme? Fyll ut skjema for meldingar om veg, trafikk og trafikkforhold.

Før du melder, hugs å sjekke om det er kommunal veg (sjå første punkt “Kven eig vegen?”).

Åslaug Bergsvåg

I Noreg er regelen stort sett vikeplikt frå høgre, med nokre unntak. Fylkesveg og riksveg har ofte forkøyrsrett for å sikre flyt i trafikken,  og desse fungerer som hovudveg. Ein uønska effekt kan vere at folk køyrer fortare på desse vegane.  

Kommunale vegar går ofte gjennom bustadområde, og forbi barnehagar og skular. På desse vegane kan det vere vanskeleg å kombinere forskøyrsregulering med ønsket om lav fart.

Meiner du at den kommunale vegen bør ha forkøyrsrett? Fyll ut skjema for meldingar om veg, trafikk og trafikkforhold.

Før du melder, hugs å sjekke om det er kommunal veg (sjå første punkt “Kven eig vegen?”).

Åslaug Bergsvåg

Bruk av alle typar fareskilt er strengt regulert i Statens vegvesen sin handbok, også kalla skiltnormalen. 

Fareskilt skal berre nyttast for å varsle 

• om fare det er vanskeleg å oppfatte i tide, 
• om fare som er vesentleg større enn det du må forvente ut frå omgivnadene, lokale trafikkforhold eller utforminga av vegen. 

Fareskilt barn (fareskilt nr. 142) varslar om stad på eller langs vegen der barn ofte ferdast eller oppheld seg nær skule, barnehage, leikeplass eller anna. I bustadområde, der ein må rekne med at det bur familiar og barn, er kriteria ikkje innfridd. 

Ønsker du at vi skal sette opp «fareskilt barn» på ein kommunal veg? Fyll ut skjema for meldingar om veg, trafikk og trafikkforhold.

Før du melder, hugs å sjekke om det er kommunal veg (sjå første punkt “Kven eig vegen”).

Skiltet “Barn leikar”

Det er berre skilt i skiltnormalen som er lovleg å bruke på offentlege vegar. Skiltet «barn leikar» er ikkje eit offentleg vegskilt, og det er derfor ikkje tillate å bruke på kommunale vegar. Dette skiltet kan du derfor ikkje søke om her. 
På privat veg kan «barn leikar»-skilt settast opp med løyve frå vegeigar.

Åslaug Bergsvåg

Trafikkspegel har ei krum overflate som gir eit forvrengt bilde av trafikksituasjonen, og gjer det krevande å bedømme fart og avstand. 

I spegelen kan det vere utfordrande å oppdage ein bil, syklist eller fotgjengar, spesielt på avstand.  Jo mindre trafikant, jo vanskelegare å sjå. Det er òg stor forskjell på menneske - spesielt barn - si evne til å tolke eit slikt forvrengt bilde. Spegel er derfor ei upåliteleg informasjonskjelde som vil kunne gi falsk tryggleik. I tillegg er spegelen sårbar for vêr og temperatur. På bakgrunn av dette ser vi ikkje spegel som ei trafikksikker løysing, og vi har gått nesten heilt vekk frå bruken av trafikkspegel. 

Har du innspel til større trafikksikringstiltak, som etablering av fortau, gangbru, eller gang- og sykkelveg, kan du melde inn innspel ved rullering av trafikksikringsplanen i Bjørnafjorden kvart fjerde år.

Har du innspel knytt til drift og vedlikehald, som brøyting, slitte fartshumpar, manglande veglys eller vegetasjonsrydding, melder du inn feilmeldingsteneste.

For å kunne behandle søknad om fartsdempande tiltak, treng kommunen å vite kven du er. Dette gjer vi for å sikre at vi kommuniserer med riktig person. Det er òg viktig for oss å ha historikk på arbeidet som blir utført i det offentlege rom ved avvik. Opplysningane blir lagra i fem år.

Data kan bli lagra i fagsystem som blir levert av tredjepart, men kjem ikkje til å bli brukt av tredjepart til andre formål. 

Du kan be om innsyn i personopplysningane vi lagrar. Dersom noko er feil, kan du kontakte kommunen for å få opplysningane retta.

Informasjon om behandlingsansvarleg og kontaktopplysningar til personvernombodet finn du på Bjørnafjorden kommune si side om personvern. Her finn du òg meir generell informasjon om personvernet ditt.