Bjørnafjorden kommune gir støtte til VM-arrangement

Pressemelding frå Bjørnafjorden kommune ved ordførar Terje Søviknes:

Etter at Noreg gjekk vidare til kvartfinale i fotball-VM, har det vore jobba med fleire fellesarrangement i Bjørnafjorden kommune knytt til visning av Noreg-England, laurdag 11. juli 2026. 

Tidlegare i veka blei det vurdert arrangement i kommunal regi, til dømes i Oseana kunst- og kultursenter. Etter dialog med frivillige lag og organisasjonar konkluderte vi med ein modell der Os Turn Fotball tar ansvar for eit kommersielt arrangement i Vognhallen på Osøyro, medan fleire frivillige lag legg til rette for gratis familiearrangement i krinsane. 

Lisenskostnaden for kommersielle arrangement er svært høg, og eit spleiselag har vore nødvendig for å dekke kostnaden. Også gratisarrangement i regi av frivillige lag har kostnader knytt til rigging, storskjerm, teknisk støtte, reinhald o.l. 

Ordførar Terje Søviknes har difor, etter rådslag med formannskapet, i dag fatta slikt vedtak i medhald av §4.6 Vedtaksmynde i hastesaker i Saksbehandlingsreglar for folkevalde i Bjørnafjorden kommune 2023-2027, jf. Kommunelova §11-8:

  • Bjørnafjorden kommune løyver kr 100 000,- i tilskot til Os Turn Fotball sitt VM-arrangement Noreg-England i Vognhallen 11. juli.
  • Bjørnafjorden kommune løyver kr 75 000,- til ein søkbar pott for frivillige lag og organisasjonar som legg til rette for gratis familiearrangement knytt til Noreg sine kampar i fotball-VM.

Samla løyving kr 175 000,- blir finansiert frå Formannskapets disposisjonsfond.

Vedtaket blir referert i Bjørnafjorden formannskap sitt første møte etter sommarferien, 3. september 2026.

Frivillige lag og organisasjonar som har arrangert, eller planlegg å arrangere, gratis lågterskelarrangement med visning av Noreg sin kampar i VM, kan søkje om tilskot ved å sende ein enkel søknad til Bjørnafjorden kommune v/ordførar Terje Søviknes på e-post tes@bjornafjorden.kommune.no
Søknaden må innehalde kortfatta informasjon om arrangør, stad for arrangement, kor mange deltakarar ein har hatt eller forventar, samt kontonummer for utbetaling. 

Takk og RO!

Ordførar Terje Søviknes. Ragnhild Stende Bjaadal/Bjørnafjorden kommune

– Eg vil rette ein stor takk til alle frivillige lag og organisasjonar som bidrar til denne folkefesten i kommunen vår, seier ordførar Terje Søviknes (FrP). Han håpar at fleire vil søkje om tilskot til arrangementa sine. Dåke e' gode, og Noreg e' gode! Då er det berre å krysse det vi har, ta del i folkefesten og heie alt vi kan på Noreg kommande laurdag. RO! RO! RO! avsluttar ein optimistisk Søviknes. 

Eventuelle spørsmål kan rettast til ordførar Terje Søviknes, tlf. 90 61 15 03. 

Publisert av Ragnhild Stende Bjaadal
Sist endra 09.07.2026 13:45