Banksjef SMB André Herfindal (til v.) og kommunikasjonssjef Vestland Craig Russel Lundervik Bøthun kom på besøk BUA for å sjå kva utstyr som er til utlån, og høyre meir om prosjektleiar Maja Holen og leiar for BUA Bjørnafjorden Lillian Kvamsøy sine planar for FikseBUA.
Stine Kobbeltvedt
Prosjektet FikseBUA skal både bidra til at utstyret BUA låner ut kan brukast lenger, og gi ungdom arbeidstrening.
Gåva frå banken gjer det mogeleg å kjøpe inn nødvendig verktøy, og kome i gang med prosjektet for alvor.
Maja Holen, prosjektleiar for FIkseBUA, og Lillian Kvamsøy, leiar for BUA Bjønrafjorden, er svært glade for støtta frå Sparebankstiftelsen SR-bank. Dei sette ekstra pris på at banksjef SMB André Herfindal og kommunikasjonssjef Vestland Craig Russel Lundervik Bøthun tok turen til BUA i OS næringspark.
- Vi er imponert over at dei kom på besøk for å få vite meir om kva vi held på med.
Du får eit heilt anna bilete når du ser alt utstyret med eigne auger, seier Lillian Kvamsøy.
Prosjektleiar for FikseBUA Maja Holen (til v.) og leiar for BUA Bjørnafjorden Lillan Kvamsøy er svært glade for støtta, og gler seg til å kome i gang for alvor.
Stine Kobbeltvedt
Stell og vedlikehald løner seg
Planen er at FikseBUA skal tilby ungdom arbeidstrening i opningstida. I tillegg til at dei får praktisk erfaring ved å reparere og drive vedlikehald, skal ungdommane i FikseBUA vere med og låne ut utstyr.
Lånarane skal alltid levere tilbake tørt og reint utstyr, men det hender folk er litt for optimistiske når dei pakkar ned soveposar eller returnerer slalåmstøvlar. Kvamsøy er sikker på at ungdommnane i FikseBUA blir ein stor ressurs både sommar og vinter. I tillegg til reparasjonar, kan dei sjekke, lufte og gå over utstyret ofte. Det kjem vel med, for BUA Bjørnafjorden opna i 2021, altså har mykje av aktivitets- og friluftsutstyret vore mykje i bruk. Utstyr som blir stelt fint med, varer lengre.
Verktøy og kursing
I tillegg til innkjøp av verktøy, vil FikseBUA bruke litt av pengane til kursing, blant anna for å endå bli betre til å preppe ski og vedlikehalde syklar. - Men til større og meir kompliserte reparasjonar er det fint å vite at vi kan få hjelp frå Livskvalitet ski- og sykkelverkstad, seier Kvamsøy.
Splitter nye syklar
BUA Bjørnafjorden utvider stadig utstyrsparken sin. Nyleg investerte dei i fleire syklar, og dei er etterspurde. Torsdag var åtte av 11 syklar utlånt. Det lover bra for sommaren.
Årets gåvemottakarar i Vestland var invitert til Bergen og frukost i banken på torsdag.
Morten Sæle