Fransisco Munoz / Bjørnafjorden kommune
Endra avstand til 2 kilometer
Planprogrammet for KPA (PDF, 2 MB) blei einstemmig godkjent av kommunestyret 18. desember. Planprogrammet er “oppskrifta” på korleis arbeidet med arealdel for heile kommunen skal gjennomførast.
Før politikarane godkjente planprogrammet, gjorde dei ei endring under punktet “bustader”. Opprinneleg forslag var at folk kunne foreslå nye bustadområde på areal som ligg maks 1,5 kilometer frå sentrumskjernen i definerte sentra, nært tenestetilbod og langs kollektivaksen Eikelandsosen – Venjaneset. Her utvida kommunestyret maks avstand frå 1,5 til 2 kilometer frå sentrumskjernen.
Bustad, næring, natur og folkehelse
Dei som jobbar med planen vil gjerne ha fleire innspel om nye bustadområde i Bjørnafjorden aust (gamle Fusa), og forslag til mogelege næringsareal i heile kommunen. Dei oppfordrar samtidig alle til å sende inn arealinnspel som er positive for naturen og/eller folkehelsa.
Dei 59 innspela som alt er komne inn, fordeler seg nokså jamt mellom dei ulike kategoriane.
Fristen for å sende arealinnspel er 15. februar 2026, men dersom du har meiningar du vil dele med oss, er det ingen grunn til å vente.
Dette er dei ulike areal-kategoriane du kan sende innspel om
Bustader
- Område til bustad på austsida av fjorden nært sentrumskjerne (maks 2 km) i definerte sentra, nært tenestetilbod og langs kollektivaksen Eikelandsosen – Venjaneset.
- Område til bustadar nært omsorgsteneste (maks 500 m) i heile kommunen.
- Område for spreidd bustadbygging i område som i dag har spreidd busetnad
Næring
- Område til næring nært eksisterande infrastruktur som overordna vegnett og kollektivaksar, kai, vatn- og avlaup.
Område for offentlege føremål
- Område til offentlege føremål nært brukarar, overordna vegnett og kollektivaksar.
Offentleg infrastruktur omfattar dei fysiske og tekniske systema som legg grunnlaget for eit
velfungerande samfunn.
Dette inkluderer - vegnett,
- vatn- og avløpssystem,
- energiforsyning,
- digitale tenester,
- offentlege bygg og tenester som
- skular,
- barnehagar,
- helse- og omsorgstilbod.
I kommuneplanen sin arealdel skal vi ta stilling til kvar og korleis slik infrastruktur skal utviklast og
lokaliserast, i tråd med mål om berekraftig arealbruk, god samfunnsøkonomi og likeverdige
tenestetilbod på tvers av kommunen.
Innanfor offentlege føremål vil vi også vurdere
- veg,
- gang- og sykkelveg,
- parkering til for eksempel ferdselsårer for friluftsliv,
- innfartsparkering
- døgnkvileplassar for tunge køyretøy,
sjølv om desse vil få andre arealføremål i plankartet.
Hamneområde framfor eksisterande naustområde
- Område der naustområde på land vert kopla til hamneområde i sjø.
Havbruk
- Område for havbruk for å sikre høgast mogeleg verdiskaping innafor berekraftige rammer.
Område for naturmangfald, idrett, friluftsliv eller likanande
- Arealinnspel som er positive for naturen og/eller folkehelsa, som eksempel viktige område for naturmangfald, idrett og friluftsliv.
"Planvask" - utbyggingsområde som ikkje lenger er aktuelle
- Innspel til overordna planvask på austsida av fjorden. Det vil seie innspel til område som i dag er sett av til utbygging, og som bør/kan endrast til LNF.
Justering av feil eller unøyaktigheiter i plankartet
- Justering av plankartet, for å inkludere etablerte, godkjente tiltak som ikkje stemmer med dagens plankart. Justering kan berre gjerast i tilknyting til eksisterande byggeområde.