Frå kontroll og utryggleik til kontakt, eigenomsorg og glede
Kva skjer når du ikkje lenger heilt stolar på kroppen din – eller på deg sjølv?
Når kroppen har vore vanskeleg å forstå, eller livet har vore krevjande, kan det vere naturleg å bli meir på vakt. Vi kan byrje å kontrollere, kjenne etter, leite etter forklaringar eller tvile på eigne signal. Kanskje pressar vi oss for langt – eller held oss tilbake fordi vi er redde for kva kroppen kan finne på.
Over tid kan dette påverke korleis vi lever, kva vi vågar å gjere, og kor mykje plass vi gir eigne behov.
Men tillit kan byggjast. Litt etter litt.
I dette foredraget utforskar vi korleis vi kan finne tilbake til ein tryggare kontakt med oss sjølve – og gradvis bygge tillit til eigen kropp, eigne signal og eigne val.
Vi ser på korleis forståing, merksemd, eigenomsorg, gode grenser og små erfaringar kan hjelpe oss til å lytte utan å overvake, ta vare på oss sjølve utan å avgrense oss, og våge små steg i riktig retning.
Vi utforskar òg korleis bevegelse, avspenning, glede, kvardagsaktivitetar og det å gjere meir av det som betyr noko for oss, kan bidra til auka kontakt og livskvalitet.
For tillit handlar kanskje ikkje om å vere sikker på at alt vil gå bra.
Kanskje handlar tillit til deg sjølv om å vite at du kan møte det som kjem – og at du vil vere der for deg sjølv, også når livet blir vanskeleg.
Eit foredrag om å bli litt tryggare på den viktigaste personen du skal leve heile livet saman med: deg sjølv.
Når kontrollen tar over, kan livet bli avgrensa.
Når tilliten veks, kan vi byrje å leve meir.