"Éi dør inn" - heilskapleg støtte for barn med livslange og komplekse helsebehov

Kva skal prosjektet bidra til?

Bjørnafjorden kommune ønskjer å vidareutvikle dagens system, slik at barn med store helseutfordringar tidleg i forløpet (0-6 år) blir sikra meir heilskapleg oppfølging, samtidig som kommunen får betre ressursutnytting og auka kvalitet i tenestene. 

Prosjektet skal utvikle ein modell for å leggje til rette for proaktive forløp i bustad- og innsatstrappa for barn (0–6 år) med livslange og komplekse helseutfordringar. Modellen skal leggje grunnlaget for ei meir heilskapleg og førebyggande oppfølging av barn og familiar – på tvers av helse, oppvekst, NAV og andre relevante tenester. Løysinga skal gjere det enklare å få heilskapleg hjelp og styrkje samhandling mellom tenestene. Vi skal òg sikre at denne samhandlinga består over tid og resulterer i at kommunen nyttar ressursane meir effektivt. 

Mål for prosjektet

Overordna mål: Å etablere ein tverrfagleg og samordna modell (éi dør inn) for proaktive forløp som sikrar tidleg innsats og koordinert hjelp til barn og familiar med livslange og komplekse helseutfordringar. 

Delmål: 

• Kartleggje og forenkle dagens samhandlingsrutinar mellom tenester. 
• Utvikle felles rutinar for oppfølging og ansvar mellom einingar. 
• Utarbeide to “personas” -historier som viser korleis dagens bustad- og innsatstrapp bør vidareutviklast for å kunne nyttast som praktisk verktøy for å leggje til rette for proaktive forløp for desse barna og familiane deira.