Bakgrunn for prosjektet
Prosjektleiar: Linda Hevrøy
⇒Vi har nyleg gjennomført ein forvaltningsrevisjon knytt til kommunen sitt tenestetilbod til barn, unge og familiar. Konklusjonen er at kommunen har eit godt organisert tenestetilbod og gode lågterskeltiltak til barn og unge, men at vi manglar eit tenestetilbod for barn og unge som allereie har etablert store vanskar knytt til psykisk helse, rus og åtferd.
Eit slikt manglande tenestetilbod utgjer ein stor risiko for at barn og unge ikkje får den hjelpa dei treng, og at kommunen har auka risiko for fleire institusjonsplasseringar gjennom barnevernet.
⇒Bjørnafjorden kommune kjøper i dag plassar ved barnevernsinstitusjonar gjennom det statlege barnevernet (BUF-etat). Dette vert definert som tenester på trinn 12, det øvste trinnet i innsatstrappa. Det er høge kostnader knytt til kjøp av institusjonsplassar, og dette verkar heller ikkje førebyggande.
I tillegg kjøper barneverntenesta inn private tiltak til barn, unge og familiar fordi kommunen manglar tenester og tiltak som er omfattande nok til å bistå desse familiane.
Eit fleksibelt oppfølgings- og behandlingsteam ("Raudt team") vil kunne bidra til at fleire får hjelp tidlegare, i eige nærmiljø, og at behandling og oppfølging kan skje utanfor institusjon eller sjukehus. Eit fleksibelt oppfølgings- og behandlingsteam har som mål å ivareta barn, ungdom og familiar som allereie har utvikla omfattande vanskar. Eit slik tiltak manglar i dagens tenestetilbod.