§ 1 Mål
Bjørnafjorden kommune skal ha eit kulturstipend som skal stimulera og inspirera til kreativitet, talentutvikling og kulturelt mangfald på heile kultur- og idrettsfeltet. Kulturstipenda skal vera ei framtidsretta kjelde til vidare utvikling og satsing innanfor den omsøkte aktiviteten.
§ 2 Målgruppe
Kulturstipendet skal gå til unge, lovande kunstnarar, idrettsungdom og kulturentreprenørar som er folkeregistrert busett i Bjørnafjorden. Det kan søkast om stipend frå og med det året søkar fyller 16 år til og med det året søkar fyller 26 år. Berre enkeltpersonar kan søka, og det kan ikkje søkast for andre. Stipendet kan berre tildelast ein gong til same person. Dei som har fått kommunalt kulturstipend i Os kommune, kan ikkje søka på nytt i Bjørnafjorden kommune.
§ 3 Storleik
Det blir kvart år delt ut inntil 2 stipend, kvart på kroner 20.000.
§ 4 Utlysing
Stipendordninga blir lyst ut offentleg kvart år.
§ 5 Søknad
Søknaden skal vera fremma av søkar på eige søknadsskjema. Tenesteutvalet kan i spesielle høve sjå bort frå denne regelen og tildela stipend utan søknad. Det skal framgå av søknad kva stipendmottakar ønsker å bruka stipendet til. Søkar skal grunngje korleis stipendet kan bidra til å utvikla talent og evner på feltet.
§ 6 Behandling
Stipendordninga blir administrert av kultureininga som førebur ei politisk sak med gjennomgang av søknadane. Tenesteutvalet gjer vedtak om kven som skal få stipend. I behandlinga skal ein sjå til at eit mangfald av uttrykk og aktivitet blir stimulert gjennom ordninga over tid. Det er òg ønskeleg at det over tid er ein god kjønnsbalanse mellom stipendmottakarane.
§7 Tildeling og kunngjering
Sjølve tildelinga blir gjort av ordførar og skal skje offentleg i ein passande samanheng. Kven som har fått stipend, skal vera kunngjort på kommunen si heimeside, og det skal her vera ei liste over namn på tidlegare stipendmotakarar.
§ 8 Endring
Framlegg om endring av vedtektene må godkjennast av Tenesteutvalet.
Vedtekne av Bjørnafjorden kommunestyre i k-sak 147/2020 - jnr 20/15002
Reviderte retningslinjer vedtekne i k-sak 104/2025 - jnr 25/164297