Hjelp heimetenestene å hjelpe

Natt og dag, heile året, i all slags vêr og på all slags føre, er dei tilsette i heimetenestene i Bjørnafjorden kommune på hjul for å gi helsehjelp, tilsyn, medisin, støtte og omsorg til folk i heimane deira. 

Mottakarane av heimetenester blir stadig fleire – utan at dei tilsette nødvendigvis blir fleire. 
For å sikre at mest mogleg tid blir brukt på og saman med brukarane, ber heimetenestene om at beskjedar og spørsmål som ikkje hastar, blir formidla via Helsenorge eller på telefon i telefontida.

Lena Leikvoll Hjelle er palliativ sjukepleiar i Heimetenestene i Bjørnafjorden kommune. Ragnhild Stende Bjaadal

– Eg trivst veldig godt i jobben min. Det er variert og meiningsfylt arbeid, seier Lena Leikvoll Hjelle, palliativ sjukepleiar i Bjørnafjorden kommune. Lena har jobba i heimetenestene sidan ho var ferdig utdanna i 2017. 

Stor tru på heimetenestene

– Eg har stor tru på moglegheitene som ligg i heimebaserte helsetenester i møte den store auken i talet på eldre og pleietrengande. Men det føreset samstundes at vi har nok tid og ressursar. For å få det til, utan at vi blir tilsvarande fleire i arbeid, må vi få jobbe meir effektivt enn vi har gjort til no, seier Lena. – Vi må få bruke meir av tida vår til faktisk helsearbeid, og mindre til alt det administrative som ikkje hastar, seier ho. 

Konstante avbrot går ut over brukarane

For kor effektivt er det å skulle stelle sår, dosere medisin og setje sprøyter og gi omsorg og støtte til sjuke og pleietrengande når telefonen ringer nesten utan stans? I løpet av ei vakt kan Lena og dei andre sjukepleiarane gjerne bli avbrotne i arbeidet 10-12 gonger. 
– Brukarane våre treng og fortener at vi har fullt fokus på dei. Det er vanskeleg å halde tråden – eller ein samtale – når eg samstundes må ta telefonen, hugse beskjedar og vidareformidle informasjon til andre, fortel Lena. 

Telefontid for samanhengande arbeidsro

No innfører heimetenestene telefontid. Målet er å styre telefontrafikken betre, slik at dei tilsette får lengre periodar med samanhengande arbeidsro. 
– Heimetenestene er ikkje ei akutteneste. Mykje kan løysast ved hjelp av planlegging – innanfor telefontida eller ved å sende oss melding via Helsenorge, seier einingsleiar for heimetenestene på Os-sida, Kristin E. Haukeland.

Her finn du oversikt over kontaktinformasjon og telefontider for heimetenestene i Bjørnafjorden kommune.

Send melding på Helsenorge 

Brukarar kan kontakte og kommunisere digitalt med heimetenestene i Bjørnafjorden kommune på Helsenorge. Dette kan òg pårørande gjere, ved at brukaren gir dei fullmakt. Sjå korleis du går fram for å gi fullmakt på helsenorge.no.
På Helsenorge kan du sjå oversikt over planlagte og gjennomførte heimebesøk, i tillegg til å avbestille heimebesøk dersom du er bortreist. 

Heimetenester: Heimesjukepleie og heimehjelp

  • Heimesjukepleie er eit tilbod til deg som har behov for helsetenester og ikkje er i stand til å oppsøkje helsetenesta/fastlegen sjølv på grunn av sjukdom eller funksjonsnivå.

    Tilsette i heimesjukepleia kan hjelpe deg med å ta medisinar, lage til måltida og hjelpe med personleg hygiene. Heimesjukepleia vil legge til rette for at du skal klare mest mogleg sjølv, slik at du kan halde fram med å bu heime. Heimesjukepleie er gratis.

    Heimehjelp er eit tilbod til deg som på grunn av sjukdom eller funksjonsnedsetting er ute av stand til å utføre nødvendige oppgåver i heimen din. Heimehjelpa kan hjelpe deg med tyngre husarbeid, som støvsuging og golvvask, klesvask, vask av bad og skifte av sengetøy.

    Målet for begge tenestene er å legge til rette for at du skal klare mest mogleg sjølv, slik at du kan halde fram med å bu heime. Heimehjelp er ei teneste brukarane betaler for.

 

Publisert av Ragnhild Stende Bjaadal
Sist endra 25.02.2025 15:10