Liten knapp kan gi stor tryggleik

Tryggleiksalarmen kan berast rundt handleddet som eit armbandsur eller i ei snor rundt halsen. Copilot

Responssenteret vurderer

Tryggleiksalarmen er på storleik med eit armbandsur, og kan berast rundt handleddet eller i ei snor rundt halsen. 
Når brukaren trykker på alarmknappen, kjem han eller ho til eit døgnbemanna responssenter som vurderer situasjonen og behovet for oppfølging. 
Mange gonger er alarmen utløyst ved ein feil, men dersom det er behov for oppfølging, blir anten pårørande eller heimetenesta varsla, avhengig av kven som står registrert som første kontakt.

I 2025 blei det trykt 7059 gonger på alarmknappen i Bjørnafjorden. 2932 av desse var reelle alarmar og blei vidareført til pårørande eller heimetenesta.

Endå betre til endå fleire

– Tryggleiksalarm gjer at ein kan kjenne seg trygg i eigen heim, trass i redusert funksjonsnivå. Med dei store demografiske endringane vi har i vente, har vi tru på at tryggleiksalarm kan vere eit godt og effektivt hjelpemiddel for at endå fleire kan bu trygt og lengre i eigen heim, seier rådgivar i avdeling E-helse og ansvarleg for brukarundersøkinga, Linn Andrea Hjelle. 
– Pårørande er som hovudregel første kontakt for responssenteret ved utløyst alarm, og det er derfor veldig viktig for oss å få deira tilbakemeldingar, i tillegg til brukarane sine erfaringar og innspel. For å utvikle tenesta må vi først vite korleis det faktisk er å ha tryggleiksalarm og om det er noko vi kan gjere betre. Resultata frå undersøkinga vil forhåpentlegvis gjere oss i stand til å gi ei endå betre teneste til endå fleire, seier Hjelle.