Trygt og godt barnehagemiljø

Mobbing av barn i barnehage er handlingar frå vaksne eller andre barn som krenker barnet si oppleving av å høyre til og vere ein viktig del av fellesskapet. Eksempel på dette kan vere:

• Fysisk mobbing = kropp og handlingar, som å slå, sparke, dytte, halde fast, øydelegge eigedelar 
• Psykisk mobbing = tankar, kjensler og relasjonar, som erting, truslar, utestenging, ryktespreiing, ignorering
   

Vaksne kan òg krenke barn med ord og handlingar dersom kommunikasjonen og relasjonen til barna ikkje er prega av respekt og toleranse.
Barnehagelova § 41 krev at barnehagane arbeider systematisk for å førebygge utestenging og mobbing, og for å skape eit godt miljø der trivsel, helse, leik og læring blir fremja.
Barnehagen i Bjørnafjorden kommune har nulltoleranse mot krenking som utestenging, mobbing, vald, diskriminering og trakassering. Det avgjerande er om barnet som blir utsett kan oppleve det som nedverdigande eller som ei krenking av integriteten. Utestenging må som hovudregel vere systematisk. Alle som arbeider i barnehagen har plikt til å gripe inn når eit barn blir utsett for slike krenkingar.
Dersom du mistenker eller opplever at barnet ditt blir mobba, ta kontakt med leiinga i barnehagen.

Tiltaksprogrammet «Saman mot mobbing» har fokus på førebygging, avdekking og handtering av mobbing og negative handlingar som kan oppstå mellom barn i barnehagen.
«Saman mot mobbing» har fokus på

• Vaksenrolla
• Barnehagemiljøet
• Barn sin medverknad
• Samarbeid med føresette
   

Bjørnafjorden kommune deltok i forskingsprosjektet med Norce og RKBU vest. Dei tilsette i barnehagane har dei tre siste åra fått opplæring i tiltaksprogrammet «Saman mot mobbing». 18 av våre 21 barnehagar har hatt opplæring i «Saman mot mobbing». 
Tema i opplæringa:

• Å forstå det – Å mobilisere mot mobbing og andre negative handlingar i samspel mellom barna. 
• Å sjå det – Å rette blikket mot mobbing og andre negative handlingar i samspel mellom barna. 
• Å snakke om det – Å snakke om negative og positive handlingar saman med barna. 
• Å lage avtale – Å lage avtale om felles reglar saman med barna. 
• Å handle – Å vere konsekvente vaksne som følgjer opp og handlar. 
• Å utvikle sosial kompetanse – Å utvikle sosial kompetanse og hente fram positive ressursar.
   

For å halde oppe kvaliteten i arbeidet med tiltaksprogrammet «Saman mot mobbing» og oppfylle krava i barnehagelova §§ 41–43, har NORCE utvikla leiingsverktøyet «Kvalitetssystem for Saman mot mobbing». Bjørnafjorden har og kjem til å fortsette å oppretthalde fokuset på tiltaksprogrammet. 

Barnehagelova § 42 inneber ei plikt til å sikre at barna i barnehagen har eit trygt og godt psykososialt barnehagemiljø.
Lova inneber ei aktivitetsplikt som krev at barnehagen følger med på korleis barna til ei kvar tid har det, undersøker og set inn tiltak når personalet har mistanke om at eitt eller fleire barn ikkje har det bra i barnehagen. Barnehagen har plikt til å undersøke saka når føresette melder frå, sjølv om dei tilsette i barnehagen har ei anna oppfatning. Det skal utarbeidast ein skriftleg plan for korleis barnehagen skal følge opp barnet og barnegruppa.
Det er òg innført ei skjerpa aktivitetsplikt i barnehagelova § 43 ved mistanke om at tilsette krenker barn.

Alle som arbeider i barnehagen har plikt til å melde frå til styrar dersom dei får mistanke om, eller kjennskap til, at eit barn ikkje har det trygt og godt i barnehagen. Styrar har ansvar for at barnehagen handterer og følger opp meldingane på ein forsvarleg måte.
 

Barnehagen har plikt til å følge med, førebygge, avdekke og handtere krenkingar og mobbing. Alle bekymringar skal møtast med forståing.

Dersom du som føresett er uroa for korleis barnet ditt har det, er det viktig at du tar kontakt med ped.leiar eller styrar i barnehagen. Barnehagen skal ta alle bekymringar på alvor og gjere dei undersøkingane som trengst for å følge opp saka vidare.

Dersom du som tilsett er uroa for om eit barn ikkje har det bra i barnehagen, har du same plikt til å undersøke saka og finne ut kva som ligg bak uroa. Barnehagen skal ha rutinar i tråd med lovverket. 

Som føresett er du, saman med dei tilsette, ein viktig ressurs og rollemodell for barnet. Trygge vaksne som viser omsorg, skapar tillit og tar ansvar, er med på å gi barnet gode og føreseielege rammer. Barnehagen er avhengig av eit nært samarbeid med dei føresette for å ta best mogleg vare på både det enkelte barnet og barnegruppa. Det er barnehagen sitt ansvar å legge til rette for eit godt samarbeid.

Barnet si stemme skal òg bli høyrd. Barn har rett til å seie meininga si i saker som gjeld dei. Dei tilsette i barnehagen har kompetanse i å snakke med barn. Gjennom samtalar med barnet og dei føresette får barnehagen betre innsikt i korleis barnet har det, og kva tiltak som kan vere til hjelp.

Barnehageeigaren har ansvar for at barnehagen blir driven i samsvar med gjeldande lover og regelverk. Eigaren skal legge til rette for, følge opp og sikre at barnehagen oppfyller desse krava.

Dersom du er misnøgd med forhold i barnehagen, bør du ta dette opp med leiinga i barnehagen. Det er barnehagen si leiing som har ansvar for tilbodet, og som skal samarbeide med dei føresette.
Gjeld saka generelle forhold i barnehagen, kan du òg ta det opp med samarbeidsutvalet (SU). Alle barnehagar skal ha eit samarbeidsutval med representantar frå føresette og tilsette, og eventuelt barnehageeigaren.
Dersom du ønsker å gå vidare med klaga eller bekymringa di, kan du ta kontakt med Bjørnafjorden kommune og barnehagemynde. Som barnehagemynde skal kommunen sjå til at barnehagane følger gjeldande regelverk. Det gjeld både private og kommunale barnehagar.
Statsforvaltaren er siste klageinstans.

Innsatsteamet for trygt og godt barnehage- og skulemiljø skal vere ei støtte for barn og unge, føresette og barnehagar/skular i komplekse saker der vanlege rutinar ikkje strekk til.

Kva gjer innsatsteamet?

• Teamet skal hjelpe barnehagen eller skulen med å løyse saker, men det er barnehagen/skulen som eig saka.
• Innsatsteamet kan støtte i det førebyggande arbeidet, men vil primært vere knytt til komplekse saker.
• For å sikre rask hjelp, skal teamet starte arbeidet sitt innan kort tid, og helst ei veke etter at føresette har meldt inn ei sak.
• Representant frå innsatsteamet skal sikre nødvendig skriftleg dokumentasjon av teamet sitt arbeid.
• Representantar frå innsatsteamet kan bidra med observasjon i barnehagen/skulen.

Kven kan melde frå?
Barn og unge, føresette, barnehagar og skular kan melde saker direkte til innsatsteamet. Tilsette som har direkte kontakt med barna det gjeld, kan òg melde frå, dersom dei opplever at barnehagen eller skulen ikkje tek ei mobbesak på alvor.
Før du tar kontakt med Innsatsteamet, skal rektor/styrar ved skulen/barnehagen vere kjend med saka.

Meld frå om mobbing

Meldinga går til Innsatsteamet, som behandlar saker fortløpande.

Slik er vi organiserte

• Teamet er tverrfagleg samansett med førebyggjande helseteneste, ungdomsteam, fagsjef skule og fagsjef kommunale barnehagar/barnehagemynde
• Teamet møtest når det kjem innmelding.
• Teamet jobbar etter modellen «reflekterande team», som betyr at vi inviterer inn sentrale personar som kan belyse saka på ein god måte.
• Vi skriv referat frå alle møta.
   

Les meir her:
Ein trygg skuledag utan mobbing | Statsforvaltaren.no (statsforvalteren.no)
Mobbing - foreldrenes og skolens ansvar - Foreldreutvalget for grunnopplæringen
FUB - Et nasjonalt utvalg for foreldre med barn i barnehage
 

Alle barn og unge har rett til eit trygt og godt barnehage- og skulemiljø.
Mobbeombodet i Vestland er eit tilbod til barn, unge og føresette som opplever at dei ikkje har det bra i barnehagen eller på skulen.

Gøril Hillersøy og Hildegunn Hodneland er mobbeombod for barn i barnehage og elevar i grunnskulen. Dei gir rettleiing i saker som gjeld det psykososiale miljøet, barnet sine rettar og kva du kan gjere dersom barnet ikkje har det bra.

Alle kan ta kontakt med mobbeombodet på telefon 57 30 03 33.
Du kan også følgje mobbeombodet på Snapchat (mobbeombod) eller på Facebook.

Mobbeombodet i Vestland - Vestland fylkeskommune