Bjørnafjorden kommune måler jamleg kvaliteten på drikkevatnet frå kommunale anlegg. I fjor viste prøvane at vassforsyninga frå Holmefjord vassbehandlingsanlegg hadde verdiar av arsen over den tilrådde grensa i drikkevassforskrifta, som er på 10 mikrogram per liter.
Filter gjer jobben
Fagfolka som arbeider med vatn og avløp i kommunen kan no melde at eit nytt filter effektivt fjernar arsen frå vatnet før det går ut til abonnentane. Spesialfilteret blei bestilt frå Tyskland, og sett i drift i juni i år. Det fungerer etter planen. Vassprøvene frå anlegget viser at arseninnhaldet no er redusert til godt under grensa på 10 mikrogram per liter, ved enkelte målingar ned mot 0. Kommunen kjem til å halde fram med å overvake arsennivåa.