Mange tilsette ved FBBS har jobba mykje ekstra over tid. For å sikre fagleg forsvarlege tenester, har vi i tillegg vore avhengige av innleige frå bemanningsbyrå.
Tilsette og leiarar på FBBS har meldt om avvik på bemanning. Situasjonen er no slik at det ikkje er forsvarleg å drive på same nivå.
Bjørnafjorden kommune har iverksett mellombelse strakstiltak for å sikre fagleg forsvarleg drift dei neste vekene og inn mot sommaren. Målet er å stabilisere drifta ved FBBS.
Desse tiltaka er iverksett:
- Inntaksstopp ved FBBS inntil vidare.
- Redusert drift. Øyeblikkeleg hjelp-døgntilbod (ØHD) ved FBBS er stengt inntil vidare. ØHD-tilbodet ved Luranetunet vil framleis vere operativt.
- Den totale drifta blir i tillegg tatt ned med seks plassar/senger. Dette skjer samarbeid med avdeling for forvaltning og koordinering og Luranetunet bu- og behandlingssenter.
- To pasientar er overført til Luranetunet, eit rulleringsopphald og to korttidsopphald er avslutta. Dette har skjedd i tett dialog med dei aktuelle pasientane og deira pårørande.
- Innleige av personell frå bemanningsbyrå for å sikre kompetanse gjennom sommaren
- Bruk av tilsette på tvers av avdelingane, med mål om å sikre rett kompetanse på rett plass til rett tid.
I tillegg jobbar eininga kontinuerleg med tiltak for å få ned sjukefråværet og sikre rekruttering med mål om på sikt å kunne avvikle innleige frå bemanningsbyrå.
Fusa bu- og behandlingssenter har hatt møte med alle leiarane og arbeidsmiljøgruppa. Alle tilsette har fått informasjon. Helse Bergen er informert om kapasitetsutfordringane.