Gratulerer med kulturstipenda!

Det er sjette året Bjørnafjorden kommune deler ut kulturstipend. Unge mellom
16 og 29 år kan søke om stipend. Målet med stipendordninga er å stimulere og inspirere til kreativitet, talentutvikling og kulturelt mangfald på heile kultur- og idrettsfeltet. Kulturstipenda skal vere ei framtidsretta kjelde til vidare utvikling og satsing innanfor den omsøkte aktiviteten.
Tenesteutvalet gjorde det endelege vedtaket om fordeling av dei to stipenda på 20 000 kroner. Stipendmottakarane i år representerer scenekultur og symjesport.

Siktar mot OL

Emil Austevoll Harlem er 19 år og bur i Os. Han driv med symjing på høgt nivå, har tatt heile 53 NM-medaljar på fire år, og drøymer om å kome til OL i 2028 og 2032. Emil sitt mål for denne sesongen er å kvalifisere seg til U23 EM.  
Stipendet vil han bruke til å reise på treningsleir med nokre av dei beste utanlandske klubbane, for å lære av verdas beste symjarar og trenarar. 

Følger draumen

Natasja Smørholm er 23 år og kjem frå Strandvik. Ho er i ferd med å etablere seg som artist på den nasjonale teater- og musikkscena. Natasja har sunge og spelt teater frå ho var barn, og jobbar målretta for å kunne leve av kunsten. Ho har terårig musikkteaterutdanning frå Bårdar Akademiet i Oslo, og er i vår regiassistent for ein musikal på Nationaltheatret. Stipendet vil ho bruke til å ta timar i song, dans og stepping, og å delta på workshops i utlandet.  

Lukke til!

Bjørnafjorden kommune håper stipenda kan bidra til at dei to mottakarane kan satsa vidare og utvikla seg innan sin aktivitet kvar på sitt vis. Bjørnafjorden kommune gratulerer så mykje med stipenda og ønsker lukke til på vegen vidare!