Kommunen + beredskapsvenner = sant

Samarbeid og fellesskap er heilt grunnleggande for at samfunnet vårt skal fungere – og det er spesielt viktig i ein krisesituasjon. Eigenberedskapsveka 2025 er straks i gang og årets oppmoding er “Finn din beredskapsvenn!” 

  • Bjørnafjorden kommune har mange gode beredskapsvenner som vi samarbeider med for å vere best mogleg førebudde på ein krisesituasjon. 
    Lokallaga av Røde Kors og Norske Kvinners Sanitetsforening er nokre av våre aller næraste beredskapsvenner. 
    Laurdag 25. oktober står vi på stand saman på Amfi Os og Fjord'n nærsenter for å oppmode deg til å finne dine beredskapsvenner. 

    Kom og snakk med oss om eigenberedskap!

Atle Vågstøl og Ann Mari Berge frå Os Røde Kors er to av beredskapsvennene du vil møte på Amfi Os på laurdag. Fusa Røde Kors og Fusa sanitetsforeining har tilsvarande stand på Fjord'n senter i Eikelandsosen. Os Røde Kors

Kvar enkelt har eit ansvar

Noreg er eit trygt og stabilt land med god beredskap. Samstundes er det nødvendig at kvar enkelt innbyggar er i stand til å ta vare på seg sjølv og dei rundt seg ved ei krise. 
Om samfunnet vårt blir ramma av større kriser som gjer at viktige tenester ikkje fungerer som normalt, kan ikkje alle få hjelp med éin gong. Kommunen og nødetatane må prioritere dei som ikkje klarer seg på eiga hand, som sjuke og pleietrengande. Vi andre må gjere det vi kan for å sikre at hjelpa kjem fram dit han bør.

Årets kampanje oppmodar deg til å legge ein plan for samarbeid i krisesituasjonar. DSB

Alle treng ikkje ha alt

Kva gjer du dersom straumen er vekke, butikkane stengde og vegen uframkomeleg i lengre tid? 

– Eigenberedskap handlar nettopp om å ha tenkt gjennom desse tinga før dei skjer, og ha lagt ein plan for korleis du kan greie deg på eiga hand i ei veke, seier ordførar Terje Søviknes. 
– Samstundes er det jo ikkje slik at alle må eller kan ha alt som står på lista over Direktoratet for samfunnssikkerhet og beredskap (DSB) sitt anbefalte innhald i beredskapslageret. Det er her beredskapsvenner kjem inn. Snakk med naboen, familien, venner eller andre rundt deg om kva de kan samarbeide om i ein krisesituasjon. Dette kan vere alt frå omsorg og støtte, til lagring av drikkevatn, mat, utstyr, overnatting og transport. 

DSB

Fellesskap er beredskap

– Fellesskap får oss gjennom kriser. Det gjeld både for enkeltpersonar og for oss som kommune. Samarbeidet vi har med frivillige lag og andre viktige samfunnsaktørar er heilt avgjerande for totalberedskapen i Bjørnafjorden kommune. Vi set stor pris på beredskapsvennene våre, seier ordføraren, som sjølv blir å treffe på stand på laurdag.

    • Eigenberedskapsveka blir i år arrangert i veke 44, og er ein årleg befolkningskampanje som set fokus på eigenberedskap. 
    • Direktoratet for samfunssikkerhet og beredskap (DSB) står bak Eigenberedskapsveka, medan kommunar, sivilforsvarsdistrikt og frivillige organisasjonar over heile landet gjennomfører aktivitetar og informasjonstiltak. 
    • Kampanjen er i år særskilt retta mot aldersgruppa 18-30 år. Undersøkingar viser nemleg at unge vaksne gjerne er dei som er minst førebudde på ein krisesituasjon. 
    • Målet med Eigenberedskapsveka er å auke bevisstheita og kunnskapen om eigenberedskap, slik at fleire førebur seg på å kunne klare seg sjølve i éi veke. Det vil gjere både deg og oss som lokalsamfunn betre rusta til å handtere kriser og hendingar som skulle oppstå.

    Les meir og få fleire råd på www.dsb.no/egenberedskap

Publisert av Ragnhild Stende Bjaadal
Sist endra 24.10.2025 10:59