Utdelinga fann stad på ei samkome på Kafé Kulí måndag. Det er 5. året Bjørnafjorden kommune har lyst ut og deler ut kulturstipend.
Anerkjenning
- Det er ei glede å kunne dele ut dess stipenda. Vi har mange talent i Bjørnafjorden, og stipenda heng høgt. Dette er ei anerkjenning av talentet dykkar, så ordførar Terje Søviknes til dei to mottakarane.
Ordførar Terje Søviknes flankert av dei to vinnarane Emil Pedersen matre og Lilly-Mae Pridmore Grønvigh
Elisabeth Farstad
Unge mellom 16 og 29 år kan søke om stipend. Målet med stipendordninga er å stimulere og inspirere til kreativitet, talentutvikling og kulturelt mangfald på heile kultur- og idrettsfeltet. Kulturstipenda skal vera ei framtidsretta kjelde til vidare utvikling og satsing for mottakarane.
I år kom det inn 7 søknader frå 4 gutar og 3 jenter. Det var færre søknader enn i fjor (10). Det har vore god fordeling på ulike kunstformer og idrettsgreiner, og det var sterke kandidatar til stipenda for 2024. Det er ikkje lett å samanlikne søkarane. Alle er talent på sine respektive område og fortener eit stipend. Med mange ulike kulturformer i søknadsbunken, vil det vere tilsvarande mange måtar å satse på og utvikle talentet sitt.
Varierte søkarar
Karrierevegen for t.d. ein musikar er svært annleis enn for den som vil fram innan ein idrett. Sjølv innan musikken er det vanskeleg å samanlikne på tvers av musikkformer og stilar. Tenesteutvalet gjorde det endelege vedtaket om fordeling av dei to stipenda på 20.000 kroner. Stipendmottakarane i år representerer musikkuttrykk og skøytesport, heiter det i grunngjevinga frå tenesteutvalet..
Og her er vinnarane:
Lilly-Mae Pridmore Grønvigh, 22
Elisabeth Farstad
Lilly-Mae Pridmore Grønvigh, er 22 år og bur i Os. Hennar lidenskap er å DJ-e, og ho arbeider under artistnavnet Ungelillemy. Ho spelar i hovudsak sjangrar som er underrepresentert i norske klubbar, men har eit dedikert miljø og interesse på nett, mellom anna hyperpop og bubblegum bass.
Sidan debuten i 2021 har Ungelillemy spelt hjå fleire etablerte kulturinstitusjonar i Bergen, som Østre, Landmark, Kulturhuset, Bergen Kjøtt, Hulen med fleire. Lilly-Mae vil bruke stipendet til å reise til By:Larm i Oslo til hausten, i tillegg å reise til Berlin der draumen er å spela hjå HÖR, ein livestream radiokanal.
Grønvigh fortel at ho har eit eige konsept, Klubb Kyberia, saman med tre andre. Ho har hatt faste spelejobbar sidan 2022 og har vore DJ på Hulen sidan februar i fjor.
- Eg vil gjerne lære meg å produsere min eigen musikk og få ut mine kreative impulsar, seier Lilly-Mae Pridmore Grønvigh.
Emil Pedersen Matre, 21, opnar kakestykket på prisutdelinga.
Elisabeth Farstad
Emil Pedersen Matre er 21 år, bur i Os og satsar skøyter fulltid i Team Sørmarka. Dei siste åra har han vore på juniorlandslaget og U23. Emil har tatt fleire medaljar både i Junior VM og seinast i U-23 World cup i Italia.
Han ønskjer å bruke stipendet til treningssamlingar, reiser til viktige nasjonale løp og utstyr til idretten sin. Kulturstipendet gir slik eit viktig bidrag til å ta steget opp i seniorklassen. Det gir høve til fleire treningsøkter på is og på raske banar. Emil har høge mål for seg sjølv og idretten og stipendet gir rom til vidareutvikling.
Han fortel at hovudinnsatsen på treningsfeltet er no, og han trener meir enn i sesongen. Han trener sykkel, styrke og spring sprint og prøver å simulere belastninga frå skøyteløp. Målet er å bli betre og bli tatt ut på verdenscup på 1500 meter, der nivået er svært høgt.
– Viss eg kvalifiserer meg til verdenscupen, har eg sjansen til å vinne, seier Emil Pedersen Matre.
Spore til vidareutvikling
- Bjørnafjorden kommune håper stipenda kan bidra til at dei to mottakarane kan satsa vidare og utvikla seg innan sin aktivitet kvar på sitt vis. Bjørnafjorden kommune gratulerer så mykje med stipenda og ønsker lukke til på vegen vidare, seier kultursjef Erik Vangsnes.