Driftsrekneskapen for Bjørnafjorden kommune (kommunekassa) viser eit netto driftsresultat på – 37,2 mill. kr for 2023. Med driftsinntekter på 2,4 mrd. kr utgjer dette ein resultatgrad på – 1,52%. Årets rekneskapsmessige meirforbruk før strykingar er på – 81,6 mill. kr. Det er gjennomført strykingar med 81,6 mill. kr. Driftsrekneskapen viser etter dette eit meir-/mindreforbruk på kr 0. Investeringsrekneskapen for 2023 er gjort opp i balanse slik at framført til inndekning i seinare år (udekka beløp) er kr 0.
Konsolidert rekneskap for Bjørnafjorden kommune 2023 viser eit netto driftsresultat på – 38,8 mill. kr. Konsolidert rekneskap omfattar Bjørnafjorden kommune, Oseana Kunst- og kultursenter Bjørnafjorden KF og Os Idrettspark Bjørnafjorden KF, men konsern-interne transaksjonar er eliminerte. Etter strykingar viser driftsrekneskapen for 2023 eit samla meirforbruk på 0,7 mill. kr. Dette må dekkast inn i 2024.
2023 har vore nok eit utfordrande år for Bjørnafjorden kommune. Rekneskapstala viser at det er til dels store meirforbruk i tenestene, slik administrasjonen jamleg har rapportert om gjennom året. Dette var i grove trekk situasjonen også i 2022. Kommunen engasjerte derfor konsulentselskapet PWC for å hjelpe oss med å identifisere moglege kostnadsreduserande tiltak. Kommunestyret vedtok på bakgrunn av dette arbeidet ei rekke innsparingstiltak våren 2023, særleg innan sektor helse og velferd. I budsjettet for 2024 er det vedtatt ytterlegare innsparingstiltak for å ta ned meirforbruket. Kommunen er i gang med å realisere desse innsparingstiltaka. Det er eit krevjande arbeid, men målet er at vi med dette skal lukkast med å snu den økonomiske situasjonen for kommunen.
Årsrekneskapen for 2023 blir no sendt til revidering.