20 barnehagar i Bjørnafjorden
Be-Prox er ei tiltaksprogram utvikla i Sveits som har som mål å førebygge, avdekke og handtere mobbing i barnehagar. I prosjektet skal forskarar ved NORCE (Norwegian Research Centre) og RKBU Nord (regionalt kunnskapssenter for barn og unge) i tett samarbeid med fagfolk frå Bjørnafjorden kommune og Narvik kommune teste ut effekten av tiltaksprogrammet i til saman 44 barnehagar, 20 av desse i Bjørnafjorden kommune.
Ein trygg og god barnehagekvardag
Tiltaksprogrammet er prøvd ut i barnehagar i Sveits der det førte til reduksjon i talet på barnehagebarn som blei mobba. I Noreg har tiltaket fått namnet Sammen mot mobbing.
Sammen mot mobbing skal no testast ut for norske forhold, tilpassa dei nye krava i barnehagelova som handlar om at alle barnehagar er pliktige til å sikre at alle barn får ein trygg og god barnehagekvardag.
Prosjektgruppa i Bjørnafjorden
Prosjektgruppa i Bjørnafjorden består av barnehagemynde Lena E. Sløgedal og fagsjef for kommunale barnehagar Irene K. Foer. I referansegruppa har dei med seg styrar i Borgafjell barnehage Anette Stene og pedagogisk leiar i Trollskogen barnehage Janne Gjøen Opsal.
Prosjektperioden går over om lag tre og eit halvt år, frå april 2023 til og med desember 2026.
Opplæring av heile personalgruppa
Opplæring i Sammen mot mobbing er modulbasert og blir gitt til heile personalet i barnehagen i løpet av eit barnehageår. Tiltaket inneheld seks modular som blir fordelt på fem samlingar over sju-åtte månader. Ferdigheitstrening og deling av praksiserfaringar er vektlagt, og personalet prøver ut tiltaka i sine barnegrupper mellom kvar samling.
Viktige tema i opplæringa:
- Haldningar og verdiar hos dei vaksne i barnehagen.
- Korleis oppdage mobbing.
- Korleis snakke med barn om negative og positive handlingar som kan skje mellom barna.
- Korleis involvere alle barna i barnehagen i å utarbeide felles reglar mot mobbing og andre negative handlingar mellom barna.
- Korleis vere konsekvente vaksne i oppfølginga av avtalte reglar.
- Korleis hente ut positive sosiale ressursar i barnegruppa
Les meir om Sammen mot mobbing-tiltaket her