Stadig fleire bedrifter i Bjørnafjorden er sertifisert som Miljøfyrtårn. Nyleg kunne ordførar Trine Lindborg dele ut tre synlege bevis på Miljøfyrtårn-status.
Malermester T. Kvittingen AS har blant anna kartlagt verksemda sitt forbruk av drivstoff og straum, og fått betre rutinar for avfallshandtering. Terje Kvittingen meiner bransjen er blitt god på å tenke resirkulering der det er mogeleg, mellom anna av golvbelegg. Bedrifta lagrar malingrestar i ein eigen tank, og Norsk gjenvinning hentar tre gonger i året.
- Trygg levering av forureinande avfall er ein stor kostnad, men vi må sjølvsagt ha ting på stell, seier Kvittingen. Bedrifta har 30 tilsette, og 2-3 lærlingar.
Normo Automasjon AS held til i Kolskogen, og har 12 tilsette. Elektro- og automasjonsentreprenøren bygger elektrotavler og styreskap til industri, forsvar og samferdsle. Avfallshandtering, særleg av mykje papp og plast, var sentralt i sertifiseringa, i tillegg til gjenbruk av stål og kobber. Dagleg leiar Svein Erik Øvreeide slår fast at Normo hadde det meste klart på førehand, og at sertifiseringsprosessen mest handla om å kartlegga rutinar som alt var innarbeidde. I tillegg til Miljøfyrtårn-krava har verksemda investert i ein el-bil som firmabil.
Os Taxi er ein av dei første taxisentralane på våre kantar som er Miljøfyrtårn-sertifisert. Sentralen tok i bruk den første el-bilen i 2020, og i dag er 15 av 20 fossilbilar bytta ut med elektriske bilar. Med faste og helgevikarar har Os Taxi til saman rundt 55 tilsette.
- Dette var veldig kjekke bedriftsbesøk. Det er alltid interessant å møte næringslivet i Bjørnafjorden og høyre korleis ulike bransjar jobbar med å bli så miljøbevisste som mogeleg, seier Lindborg.