Ordførar Trine Lindborg hadde med seg Miljøfyrtårn-plakettar på bedriftsbesøk til Fløysand Tak AS og Skaathun Bilverkstad AS, som begge held til i Industrivegen. Grunn og Betong AS fekk overrekt sin plakett på Rådhuset.
Miljøbevisst i alle ledd
Fløysand Tak AS har 165 tilsette frå 13 nasjonalitetar, fordelt på avdelingar for taktekking, blekkverkstad og administrasjon. For å bli sertifisert har verksemda gjennomgått avfallshandtering og -sortering, innkjøpsrutinar, transport, HMS og miljøplan, i tillegg til rutinar for behandling av farleg avfall og kjemikaliar. Miljøfyrtårn-ansvarleg i bedrifta, Bente Prestøy, opplyser at arbeidet har vore tidkrevjande, men lærerikt. Formålet har vore å bli miljøbevisst i alle ledd, gjennom heile organisasjonen og i samarbeid med kundar og samarbeidspartnarar. Fløysand Tak kan dermed dokumentere at strenge kriterium innanfor områda arbeidsmiljø, innkjøp, energi, transport, avfall, utslipp og estetikk er tilfredsstilt.
Stadfesting av eksisterande rutinar
Skaathun Bilversted AS har ti tilsette. Bedrifta opplyser at dei fekk sertifiseringa raskt på plass, fordi dei over mange år har jobba med sortering og endring i miljøvenleg retning.
Bjarte Bøe tok imot Grunn og Betong AS sin plakett. Bedrifta har 11 tilsette, lærling og elevar i utplassering. Grunn og Betong heller ikkje brukt svært lang tid på sertifiseringsprosessen, då dei hadde eit godt system på plass. Framover handlar det om å heile tida ha kontroll på forbruk, diesel m.m. Verksemda har ein rimeleg ny maskinpark og ei elektrisk gravemaskin. Dei jobbar mykje som hovedentreprenør, men har òg mange oppdrag som underleverandør i større prosjekt, der dei ser svært god nytte i å vere sertifisert.