Vegarbeid: Frustrerande for mange - nødvendig for alle

Siril Langhelle/Bjørnafjorden kommune

Forstår frustrasjonen

Sidan januar har det pågått arbeid med å legge nye hovudleidningar for vatn og avløp i Giskavollen. Vegen er stengt frå både barneskule-sida og Landboden-sida, og trafikken går om sentrum eller Borgavegen/Finnebrekka. 
Arbeidet skal etter planen vere sluttført i juli.

I Byvegen har det vore gravearbeid,  stengt køyrefelt, stengt gangveg og lysregulering sidan februar. Då starta prosjektavdelinga, entreprenør Løvaas Maskin AS og Rørleggeriet AS arbeidet med å legge ny hovudleidning for vatn. Byvegen skal etter planen opne 5. juli.

– Eg forstår godt at det er frustrerande med venting og omkøyring - spesielt for dei som bur i området rundt skulane, kor det har vore mykje vegarbeid dei siste åra, seier Siril Langhelle i prosjektavdelinga i Bjørnafjorden kommune. 

Grunnforholda i Byvegen byr på mange utfordringar. Siril Langhelle/Bjørnafjorden kommune

Stenger aldri for moro skuld

− Dessverre er det av og til heilt nødvendig å stenge, for at vi skal kunne gjere vegar og vassforsyning betre og sikrare. Eg kan forsikre om at vi aldri stenger vegar unødvendig eller for moro skuld. Eg kan òg forsikre om at det blir jobba kontinuerleg. Vi er alle interesserte i å få gjort jobben så raskt og godt som mogleg. Av og til skjer det uføresette ting, som til dømes at vegen står i fare for å rase ut, som var tilfelle i Byvegen. Då stansar vi arbeidet i påvente av ekstra sikring, slik at det er trygt for arbeidarane å halde fram med jobben, fortel Langhelle.

Hald ut!

− Sjølv om ein køyrer forbi ofte, er det ikkje alltid ein får med seg heile biletet og har oversikt over kva som skjer eller ikkje skjer i arbeidet. Hald ut! Ha i bakhovudet at målet med arbeidet er at det skal bli tryggare og betre å bu og ferdast for alle, oppmodar Langhelle.