Prestegardshagen har fått frukttre, bærbuskar og plantekasser - alt er lagt til rette for at hagen skal vere ein levande oase for folk, fuglar, insekt og dyr.
Her ligg òg nokre av dei eldste bygningane i kommunen, som har husa prestar heilt sidan 1350. Desse husa har fått æra av å vere dei første bygga i kommunen med blå kulturhistorie-skilt. Dørene er opne under hagefesten.
Det blir bollar og saft, arkitektur- og kulturhistorie, historiske leikar og levande permakultur. Alle er hjarteleg velkomne!
Os prestegard, laurdag 29. oktober 2022, klokka 13
- Ordførar Trine Lindborg opnar hagen.
- Kultursjef Erik Vangsnes fortel om prestegardshusa og planen for framtidig bruk.
- Landbruksrådgivar Heidi Gaustad fortel om ideen bak og meininga med folkehagen.
- Leiar i Fortidsminneforeningen Bjørnafjorden, Ingebjørg Astrup, fortel om blå skilt-prosjektet før skilta blir avduka.
- Paktaren og Borgstova er opne for publikum.
- Prøv stylter, hestesko og sprettepinn.
- Historisk quiz.
Den "nye" prestebustaden frå 1925. Bak til høgre ligg Borgstova som var prestebustad frå 1350, vegg i vegg med Glasstova, som overtok som prestebustad frå 1650.
Ragnhild Stende Bjaadal
Prestebustadar gjennom 670 år
Borgstova og Glasstova (eller Paktaren) og hovudbygningen har på initiativ frå Fortidsminneforeningen sitt lokallag i Bjørnafjorden fått blå skilt på ytterveggen. Blå skilt representerer kulturhistorie i kortform, og fortel om ein bygning, ei historisk hending eller person som er knytt til staden. Det er ei ære å bli tildelt eit blått skilt, og lokallaget med leiar Ingebjørg Astrup i spissen, har lagt ned mykje arbeid i å få dette til.
Skilta blir offisielt avduka av ordføraren på hagefesten.
Husa har fått ei oppgradering det siste året, og du er velkommen innom for å sjå kor fint det er blitt.
Folkehagen - til glede og nytte
Prosjektet "Folkehagen" er ein del av oppgraderinga av uteområdet ved Os ungdomsskule og Os Aktiv, og vidare mot kunstgrasbanen på parkeringshuset. Landbrukskontoret, i samarbeid med kultureininga og prosjektavdelinga i Bjørnafjorden kommune, har laga ei grøn lunge til glede og nytte for alle.
I desse plantekassene kan du dyrke og hauste din eigen mat.
Ragnhild Stende Bjaadal
Dyrk og haust din eigen mat
Det er planta eple-, pære- og plommetre inn mot ungdomsskulen. Dette er økologiske tre av høg kvalitet, planta i eit espalier-/hekksystem for å gjere det enklare å plukke frukta, i tillegg til å halde mikroklimaet riktig. Folkehageansvarleg ved landbrukskontoret, Heidi Gaustad, fortel at det òg er planta bærbuskar, humle og minikiwi. Skulane og andre interesserte, kan bruke plantekassane til å dyrke og hauste mat.
Ein god stad å vere for alle
Hagen er ein permakulturhage - det vil seie basert på lokale, stabile og produktive system i balanse med naturen. Hagen skal kunne klare seg med svært låg ressursbruk og fruktene haustast med lågast mogleg innsats.
Han skal vere tilgjengeleg for barne- og ungdomskuleelevane i nærleiken, i tillegg til brukarar av dagsenteret Kontakto, som held til i prestebustaden.
Hagen skal vere ein god stad å vere for alle, både vekster, insekt og folk.
Prestegardsbygningane er nokre av dei eldste husa i kommunen, og har no fått "blå skilt" på initiativ frå Fortidsminneforeningen Bjørnafjorden.. Skilta blir offisielt avduka på hagefesten. Her kan du òg høyre meir om bygningane og besøke dei.
Ragnhild Stende Bjaadal