Administrasjonen vil senda forslag til midlertidig endring i retningsliner for sals- og skjenkeløyve i Bjørnafjorden kommune 2025-2028 på forenkla høyring. Saka blir deretter lagt fram til politisk behandling i neste møterunde.
Forslag frå Helse- og omsorgsdepartementet
Helse- og omsorgsdepartementet har foreslått ei midlertidig endring i alkohollova § 4-4, (PDF, 255 kB)som gir kommunane høve til å fastsetta utvida skjenketider under fotball-VM for herrar. Regjeringa har sendt forslaget ut med høyringsfrist 13. mars. Forslaget opnar for skjenking av «øl og vin» (gruppe 1 og 2) på nattestid under fotball-VM 11. juni til 19. juli 2026.
Departementet har presisert at kommunane kan senda forslag til nødvendige endringar i kommunalt regelverk på lokal høyring før Stortinget si behandling dersom det blir tatt atterhald om at lovendringa blir vedtatt.
Forslag frå administrasjonen
Bjørnafjorden kommune vurderer å opna for midlertidig utvida skjenketid under fotballkampar i VM for herrar sommaren 2026.
På grunn av tidsforskjellen blir fleire kampar vist på nattestid i Norge. For å gjere det mogeleg å skjenke alkohol for skjenkestader som viser kampane, har regjeringa foreslått midlertidige endringar i alkohollova som gjer det mogeleg å opna for utvida skjenketid inntil klokka 6 for gruppe 1 og 2.
Dersom kommunen skal nytta høvet til utvida skjenketid, må Bjørnafjorden kommune sine retningsliner endrast midlertidig for den aktuelle perioden.
Administrasjonen sitt forslag om midlertidig endring i kommunale retningsliner innanfor rammene av forslaget frå regjeringa blir med dette sendt på høyring.
Endeleg vedtak blir gjort av Bjørnafjorden kommunestyre.
Høyringsfrist: tysdag 31. mars 2026.
Alle kan gi uttale.