Formål med forskrifta
- Formålet med forskrifta er å legga til rette for at utleige av små elektriske køyretøy på offentleg grunn i Bjørnafjorden kommune bidreg til framkommelege og trygge offentlege rom, klimavennlege løysingar og eit godt miljø og lokalmiljø. Forskrifta skal bidra til effektiv forvaltning av løyve til utleige av små elektriske køyretøy
- Elektriske sparkesyklar (små elektriske køyretøy) er eit populært framkomstmiddel og kan vera eit positivt tilskot til transporttilbodet i kommunen vår. Elsparkesyklane kan samstundes potensielt føre med seg store utfordringar for generelt framkomme og tryggleik for andre trafikantar, og for forvaltninga av det offentlege rom.
- Kommunedirektøren ser difor eit klart behov for å regulera utleiga av små elektriske køyretøy i kommunen vår, for slik å sikra trygge og tilgjengelege offentleg rom for alle innbyggarane våre. Høyring av forskrifta er eit viktig steg på vegen mot denne reguleringa.
Bakgrunn for forskrifta
Bjørnafjorden kommune begynte på arbeidet med å vedta ei lokal forskrift våren 2022. I møte 21.06.2022, sak 89/2022, vedtok Bjørnafjorden formannskap å senda forslag til forskrift ut på høyring. Utkastet til forskrift var òg på høyring i Bjørnafjorden ungdomsråd, Råd for menneske med nedsett funksjonsevne og Bjørnafjorden eldreråd.
Då formannskapet behandla forskrifta etter høyringsrunden, vedtok dei å senda saka tilbake til administrasjonen for å vurdera og eventuelt innarbeida tema som vart løfta då Plan-, bygg- og miljøutvalet behandla saka.
Årsaka til at forskrifta blir teken opp igjen til behandling først no, er at det i mellomtida ikkje har vore aktørar som har drive utleige av sparkesyklar i Bjørnafjorden kommune. Arbeidet med forskrifta i 2022 hadde sitt utspring i at ein sparkesykkelaktør ønskte å etablera utleige i kommunen. Allereie før kommunen var i mål med forskrifta hadde sparkesykkelaktøren avslutta satsinga si og trekt seg ut frå kommunen, og arbeidet med forskrifta vart lagt på is.
I oktober 2025 plasserte utleigefirmaet Voi ut sparkesyklar for i Os sentrum, og behovet for ei lokal forskrift som regulerer slik utleige vart igjen aktualisert. Fordi det har gått meir enn tre år sidan sist forskrifta var på høyring, vurderer kommunedirektøren at det er nødvendig med ein ny høyringsrunde for at saka skal vera så godt opplyst som mogleg. Det har òg skjedd lovendringar sidan 2022.