Plan-, bygg- og miljøutvalet har gjort vedtak om å senda justert framlegg til detaljreguleringsplan for gang- og sykkelveg frå Lyseparken til Søfteland på 2. gangshøyring. Det blir også varsla at planområdet er utvida med ei større breidde på kryssområdet mellom Byvegen og Vindalsvegen, samt ta med eksisterande fortau på motsett side av Byvegen. Utvidinga er gjort for å regulera inn tilrettelagt kryssing av Byvegen for mjuke trafikantar.
Kartutsnitt som viser kryssområdet ved Vindalsvegen og Byvegen. Til venstre er kartet som tidlegare har vore på høyring, til høgre er planområdet utvida til noverande høyring.
Planen sitt hovudføremål er gang- og sykkelveg med tilhøyrande annan veggrunn og kollektivhaldeplass, samt vegføremål i Vindalsvegen og kryss Byvegen.
Du finn plankart, føresegner og alle dokument i sak 23/901 her: Innsyn
Kartet er også tilgjengeleg i kommunen si kartteneste: Kommunekart
Planframlegget er justert etter offentleg ettersyn, og det er gjort fleire viktige tilpassingar for å redusere inngrep i natur og landskap. Blant anna er vegen nedskalert frå separat sykkelveg og fortau til ein kombinert gang- og sykkelveg, noko som reduserer påverknad på terreng, vegetasjon og naturverdiar. Det er også fjerna planlagt massedeponi, og det er lagt inn krav om overvaking og avbøtande tiltak gjennom ytre miljøplan. Planområdet er også utvida til å inkludera krysset mellom Byvegen og Vindalsvegen, for å regulera inn tilrettelagt kryssing av Byvegen for mjuke trafikantar.
Eventuelle merknader til endringane skal sendast til post@bjornafjorden.kommune.no innan 3. oktober.
Ver venleg og vis til saksnummeret 23/901.
Folkemøte
Det vil i løpet av hausten bli halde eit ope folkemøte på Søfteland. Tema for møtet vil bli både denne planen, områdeplan for Bergstø og kommuneplanens arealdel (KPA). Tidspunkt vil bli annonsert seinare.