Elin Huseby starta Kaizen Consult for eit knapt år sidan. - Det har vore travelt, men det er sjølvsagt eit luksusproblem å ha mykje å gjere frå første dag, seier Huseby. Ho trengte å utvide, og er glad for å ha fått Ellen Marie Westvik som kollega. Westvik begynte sin aller første arbeidsdag i Kaizen med Miljøfyrtårn-møte hos ordføraren.
Strenge lovkrav
Miljøfyrtårn-rettleiing utgjer ein del av oppdraga til Kaizen, elles bistår dei blant anna bedrifter i alle bransjar med internasjonal kvalitet-, miljø- og HMS-sertifisering. Både Huseby og Westvik har òg erfaring frå kommunalt HMS-arbeid i Os og Bjørnafjorden. - Vi blei begge tilsett i Os kommune av tidlegare personalsjef Eva Røttingen. Ho hadde respekt for at HMS er eit eige fagfelt, og gav oss rom til å drive med faget vårt.
Når små bedrifter skal skal i gang med omfattande internasjonale ISO-sertifiseringar, møter dei same lovkrav som dei store.
- Då trengst det gjerne ekstern bistand, og Kaizen kan ta seg av prosjektorganiseringa, seier Huseby og Westvik.
Dei understrekar at det å få Miljøfyrtårn-status er ein mindre omfattande prosess, og eit oppnåeleg mål for mange bedrifter.
Kundar forventar miljøsertifisering
Stadig fleire kundar stiller krav om at leverandørbedrifter må vere miljøsertifiserte for å kunne konkurrere om oppdrag.
Felleskriteria som alle bedrifter må oppfylle for å bli Miljøfyrtårn, er bant anna forankring i mål og handlingsplan, krav til innkjøp, sortering av avfall, transport og energiforbruk.
- For vår del var transport ut til kundar ein vesentleg faktor i vår eiga miljøkartlegging, seier Huseby. Kaizen kan gjennomføre mange møte på Teams frå kontoret i Ulvenparken, og elles brukar dei el-bil til nødvendige reiser.
- Det er kjekt å møte lokalt næringsliv og høyre om korleis dei jobbar. Utfordringane er veldig ulike. Enkelte bedrifter må gjere store endringar for å bli Miljøfyrtårn, andre treng berre små tilpassingar, seier Lindborg.