Slit du med å få endane til å møtest før jul? Vi er mange som gjerne vil hjelpe deg!

Inga skam å ha dårleg råd

– Det er inga skam å slite økonomisk! Dei aller fleste av oss merkar godt at rentene og prisane har auka dei siste åra. Når alle faste utgifter er betalt, er det mindre til overs for alle. Men nokre har faktisk ingenting til overs. Det er rett og slett ikkje ei krone igjen til gåver til barna og julekos, seier dagleg leiar av Os frivilligsentral, Stine Kobbeltvedt, som står bak julegåveaksjonen Prosjekt Hjartetre.

Mange fekk hjelp i fjor

Saman om ei god jul for alle er mottoet for julegåveaksjonen, som blei arrangert for første gong i Bjørnafjorden i fjor. 288 familiar og enkeltpersonar melde seg for å motta julegåver til barna sine og bidrag til innkjøp av julemat. 
301 barn fekk julegåver frå gåvmilde bjørnafjordingar.

– Tusen, tusen takk til alle som bidrog i aksjonen i fjor. Det er fantastisk å kjenne så mykje varme, omsorg og velvilje frå lokalsamfunnet. Då får ein tru på menneska - midt oppi alt som er vondt og vanskeleg i verda, smiler Stine.

Stine Kobbeltvedt er dagleg leiar i Os frivilligsentral, og initiativtakar til Prosjekt Hjartetre.

Sterke historier

– Menneska eg møtte og historiene eg fekk høyre i samband med Prosjekt Hjartetre i fjor gjorde sterkt inntrykk. Mange familiar har ikkje råd til å gi julegåver til barna sine, eller til å handle inn noko som helst ekstra i samband med julefeiringa. Det er snakk om heilt vanlege folk, som deg og meg, i ein fortvila situasjon, seier Stine.

Hjartetrea kjem på kjøpesentra

Prosjektet har fått namnet sitt frå “hjartetrea” du vil finne på Amfi Os og Fjord'n senter når det nærmar seg jul. På desse juletrea vil det henge hjarte med gåveønske frå barn mellom 0 og 18 år i Bjørnafjorden kommune. 
Alle som vil, kan ta med seg eit hjarte og oppfylle eit gåveønske. Det vil òg bli mogleg å bidra på Vipps. 

– Men aller først må vi vite kor mange som ønskjer å motta hjelp. Påmeldingsfrist er 1. desember. Vi kjem tilbake med meir informasjon til alle godhjarta folk som ønskjer å bidra, seier Stine.

Prosjekt Hjartetre

Julegåveaksjonen Prosjekt Hjartetre er eit fellesprosjekt mellom frivilligsentralane, eldsjeler, hjelpeorganisasjonar, kommunale einingar og næringsliv i kommunen vår. 
Målet for prosjektet er å spreie glede og varme til barn, unge og familiar som har det ekstra trongt i samband med jul, gjennom eit felles julegåveprosjekt kor privatpersonar og næringsliv kan oppfylle juleønske frå barn og unge i nærmiljøet. I tillegg vil dei gi bidrag til julemat for dei som treng det. 

Bjørnafjorden kommune ved Os frivilligsentral har ansvaret for prosjektleiing og økonomi.