Altfor mange heimebuande eldre kjenner på einsemd, og svært mange av desse har ikkje tilgang på eigen bil.
Å måtte lite på at pårørande skal køyre deg dit du vil, når du vil, er ikkje enkelt for nokon av partane. Det er heller ikkje slik at alle har pårørande i nærleiken.
Skal du kunne kjenne deg trygg og komfortabel i eigen heim, må du vite at du kan komme deg dit du vil, når du treng det, utan at det går ut over økonomien din.
Prosjektet «Heima best» i Bjørnafjorden kommune skal greie ut korleis vi kan nå den nasjonale målsettinga om at eldre skal bu heime lengst og best mogleg.
Seniordrosje-tilbodet er eit svar på dette. For å trivst heime, må ein ikkje kjenne seg «fanga» heime.
Seniordrosje er ei praktisk, konkret og effektiv løysing på ei rekke utfordringar:
- Heimebuande eldre og einsame får moglegheit til å delta på sosiale arrangement.
- Pårørande får avlastning.
- Frivillige utan bil kan komme seg til og frå oppdrag – og kanskje endå fleire melder seg til teneste når det er enkelt å komme seg til og frå.
- Lag, organisasjonar og andre arrangørar får publikum og deltakarar til sine arrangement.
Seniordrosje i Bjørnafjorden kommune 2023 er finansiert gjennom ei løyving på 120 000,- frå formannskapet sitt disposisjonsfond.
Tilbodet er organisert av Os Pensjonistforening, i samarbeid med Os Taxi, Fusa Taxisentral, Bjørnafjorden eldreråd, Os frivilligsentral, Fusa frivilligsentral og Bjørnafjorden kommune.